រាជធានីភ្នំពេញ៖ នាព្រឹកថ្ងៃទី៣០ ខែតុលា ឆ្នាំ២០២៥ តំណាងដ៏ខ្ពង់ខ្ពស់ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានគណ:កម្មាធិការរដ្ឋាភិបាលឌីជីថល ឯកឧត្តម ជា សេរីវឌ្ឍ អគ្គលេខាធិការ នៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល (គ.រ.ឌ.) បានអញ្ជើញចូលរួមជាភ្ញៀវកិត្តិយស និងជាវាគ្មិនក្នុងកិច្ចសន្ទនាគោលនយោបាយស្ដីពី៖ ការផ្សារភ្ជាប់នវានុវត្តន៍នឹងគោលនយោបាយ - បញ្ញាសិប្បនិម្មិត បរិស្ថានសាកល្បង ការធានារ៉ាប់រងសុខភាពជាសកល និងអភិបាលកិច្ច (Policy Dialogue: Aligning Innovation with Policy - AI, Sandboxes, UHC and Governance) អំឡុងពេលវេទិកា “EuroCham Healthcare Forum and Innovation Exhibition 2025” នៅសណ្ឋាគារ 𝗦𝗨𝗡 & 𝗠𝗢𝗢𝗡 𝗥𝗶𝘃𝗲𝗿𝘀𝗶𝗱𝗲 𝗛𝗼𝘁𝗲𝗹 ដោយមានការអញ្ជើញចូលរួមពីតំណាងថ្នាក់ដឹកនាំក្រសួង ស្ថាប័នពាក់ព័ន្ធនានា អ្នកជំនាញផ្នែកសុខាភិបាល អ្នកនវានុវត្តន៍ឌីជីថល និងអ្នកផ្តល់សេវាហិរញ្ញវត្ថុផងដែរ។

នៅក្នុងកិច្ចពិភាក្សានេះ ក៏មានការអញ្ជើញចូលរួមពី ឯកឧត្ដមវេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល នៃក្រសួងសុខាភិបាល ឯកឧត្ដមបណ្ឌិត តាំង ងួនលី នាយកប្រតិបត្តិនៃមជ្ឈមណ្ឌលបណ្តុះបណ្តាលធុរកិច្ចថ្មី “តេជោ” និង លោក ឈុត ឡាយវាសនា អនុប្រធានលេខាធិការដ្ឋានគាំពារសង្គមឌីជីថល នៃអគ្គលេខាធិការដ្ឋានក្រុមប្រឹក្សាជាតិប្រព័ន្ធគាំពារសង្គម ហើយធ្វើការសម្របសម្រួលដោយលោកបណ្ឌិត 𝗘𝗹𝗶𝗮𝘀 𝗘𝗻𝗴𝗲𝗹𝗸𝗶𝗻𝗴 សហប្រធានគណៈកម្មាធិការថែទាំសុខភាព EuroCham ប្រធានផ្នែកសុខភាពឌីជីថលនៅ Intercare Health Group និងជាទីប្រឹក្សាប្រព័ន្ធសុខភាព GIZ។